40 years of excellence !!! 💃💃💃

 40 years of excellence !!! 💃💃💃

എന്ത് പെട്ടെന്നാണ്....?  നഴ്സറി സ്കൂളിൽ നിന്നും പത്താം ക്ലാസ്സിൽ എത്തിയത്... പഠിക്കുമ്പോൾ എങ്ങനേലും കോളേജിൽ എത്തണം എന്നായിരുന്നു....

കളർ ഡ്രസ്സ്‌ ഇടാൻ വേണ്ടി പ്രീഡിഗ്രി എടുത്തു.... ഡ്രസ്സ്‌ ഒക്കെ ഇട്ടു ചെത്തി നടന്നു... പ്രൊജക്റ്റ്‌ വർക്കിനും വൈവയ്ക്കും കാത്തു നിന്നപ്പോൾ..  എങ്ങനേലും ഈ പണ്ടാരമൊക്കെ തീർന്ന് ഒരു ജോലി ആയാൽ മതിയെന്നായിരുന്നു....

വായിനോട്ടവും, പ്രേമിക്കാൻ ഉള്ള ഒരു ചാൻസ് ഉം നോക്കി നോക്കി നടന്നു....ദാ ന്നു പറഞ്ഞു കോളേജ് കാലം തീർന്നു...  ജോലിയായി.... ജോലിയുടെ പ്രഷർ കൂടി കൂടി വന്നപ്പോൾ എങ്ങോട്ടെങ്കിലും ഓടി രക്ഷപെട്ടാൽ മതി എന്നായിരുന്നു.....

രക്ഷപെട്ടു എന്നും പറഞ്ഞു ഓടി ചെന്നത് ലവ് കം അറേഞ്ജ്ഡ് മാര്യേജിൽ 😂...... പിന്നെ വീട്ടുകാരിയായി ആയി, കോംപ്ലക്സ്കൾ ആയി, ഫെമിനിസ്റ്റ് ആയി, ഇടയ്ക്കിടയ്ക്ക് ഡിവോഴ്സ് ചെയ്യണമെന്നായി, പിള്ളേരായി, അവരുടെ കാര്യങ്ങളായി, പഠിത്തമായി , വീട്ടുജോലിയായി ... ഗതികേടുകൾ കൂടി കൂടി വന്നു....

കയ്യിലിരുപ്പ് കൊണ്ട് ജോലി പോയി.. വീട്ടിലിരുപ്പായി... കരച്ചിലായി, പിന്നെ അടുത്ത പണി തപ്പലായി.... എന്തൊക്കെയോ ആകാൻ വേണ്ടി എന്തൊക്കെയോ ചെയ്ത് കൂട്ടലായി, പാഷൻ എന്നും പറഞ്ഞു, പിന്നെയും ഒന്നെന്നു കെട്ടിപ്പൊക്കി തുടങ്ങി....

 പിള്ളേരൊക്കെ തനിയെ കഴിക്കാനും, ഉടുപ്പിടാനും, അത്യാവശ്യം വിശന്നാൽ മാഗ്ഗി ഉണ്ടാക്കി കഴിക്കാനും ഒക്കെ ആയി.... എന്നാലും ഉത്തരവാദിത്വം എന്ന കലിപ്പുകൾ തീരുന്നില്ലലോ പുള്ളേ!!!

വയ്യാത്ത പിള്ളേരെ നോക്കി ഉറക്കമൊഴിക്കേണ്ട സാഹചര്യം ഒക്കെ മാറി ഉറങ്ങാൻ അവസരം വന്നപ്പോൾ... നിദ്രാ ദേവി ദുബായിക്ക് പോയി...

ഒരുവിധം ഒതുങ്ങി കൂടാം, ഇനി ഒന്ന് സ്വസ്ഥമായി ജീവിതം ആസ്വദിക്കാം എന്നായപ്പോൾ, മുട്ടുവേദന ആയി, കാഴ്ചക്കു പ്രശനം ആയി, പല്ല് 3-4 എണ്ണം റൂട്ട് കനാലും.. മറ്റെല്ലാത്തിലും പുളിപ്പും പോതും ആയി, നടുവേദനയും, തലവേദനയും കൂടപ്പിറപ്പുകൾ ആയി.... കാൻസർ എങ്ങാനും വന്നാലോ എന്ന പേടിയിൽ വർഷാവർഷം ചെക്ക്പ്പുകൾക്കു ക്യാഷ് കൊടുത്തു മുടിയാറായി....ഡോക്ടർമാരെ കാണുന്നതേ വെറുപ്പായി... എല്ലാ മാസവും ചെയ്യേണ്ടത് കൊണ്ട് ഹെന്നയോ / ഡൈ യോ പരീക്ഷിക്കാതെ.. ഇന്ദിര ഗാന്ധി സ്റ്റൈൽ ആക്കിയാലോ എന്നാണ് ആലോചന...

ഇനിയും അക്കമിട്ടു നിരത്താനാണേൽ.... 

1. ഞാൻ ഒക്കെ കുഞ്ഞായിരുന്നപ്പോൾ എന്നും പറഞ്ഞു അന്നയെയും ആനിയെയും വെറുപ്പിക്കാം....

2. അച്ചാച്ചിയോടും അമ്മച്ചിയോടും പോലും തട്ടികെയറാം.... നിങ്ങൾക്കൊന്നും അറിയത്തില്ല... ഞാൻ പറയുന്നത് കേൾക്കു.... എല്ലാം എന്റെ തലയിൽ കൂടി ആണ് പോകുന്നത് എന്ന രീതിയിൽ ഷോ കാണിക്കാം....

3. വഴിയിൽ കൂടെ പോകുന്നവരെ ഉപദേശിക്കാൻ ഒക്കെ ആയി എന്ന അഹങ്കാരം തല പൊക്കി തുടങ്ങി... കാരണം... തല നരച്ചവർ എന്ന ടൈറ്റിൽ കിട്ടിയല്ലോ... 😜

4. ഇഷ്ട്ടം ഉള്ളപോലെ നടക്കാം, ക്യാഷ് ചിലവാക്കാം... ചോദിക്കാനും പറയാനും ആരുമില്ല...

5. ഇങ്ങനെ മുടിക്കെട്ട്, ഈ ഡ്രെസ്സിട് എന്നൊന്നും പറഞ്ഞാൽ മൈൻഡ് ചെയ്യാത്ത, എന്റെ മിനിയെച്ചറുകൾ വളർന്നു വരികയാണ് എന്ന യാഥാർഥ്യം മനസിലായി തുടങ്ങി....

6. അമ്മക്ക് എന്തറിയാം എന്ന ചോദ്യങ്ങൾ എനിക്ക് നേരെ വരാൻ തുടങ്ങി ...

7. ഞാൻ ഒരു സംഭവം ആണെന്ന് മക്കളെ പ്രൂവ് ചെയ്യാനായി ചില കാട്ടിക്കൂട്ടലുകൾ ചെയ്യേണ്ടി വരുന്നു....  ചീപ്പ്‌ പരുപാടി ആണ് എന്നാലും....

8. വഴക്കിടാനായി വായും കയ്യും തരിക്കുമെങ്കിലും... പോട്ടെ പോട്ടെ എന്നു വെക്കാനുള്ള ഒരു മനസ്സു വന്നു തുടങ്ങി.... പൂർണമായിട്ടില്ലെങ്കിലും... വിട്ടുകളയുക ആണ് ആരോഗ്യത്തിന് നല്ലതെന്നു മനസിലായി തുടങ്ങി....

9. ദേഷ്യം പ്രകടിപ്പിക്കാൻ... അടുക്കളയിലെ പാത്രങ്ങൾ ശബ്ദത്തോടെ നീക്കുന്നതിലൂടെ സിഗ്നൽ കൊടുക്കാൻ പറ്റുമെന്ന പുതിയ ടെക്‌നിക്‌ കൾ മനസിലായി തുടങ്ങി....

10. എങ്ങോട്ട് പോകണമെങ്കിലും ഒരു നരച്ച ചുരിദാറും, മേക്കപ്പ് ഇല്ലാത്ത മുഖവുമായി ഇറങ്ങാനുള്ള കോൺഫിഡൻസ് ആയി....

11. ആൾക്കാരെ മാറ്റാൻ ഒക്കില്ല എന്നും... ഒന്നെങ്കിൽ അക്‌സെപ്റ് ചെയ്യുക അല്ലെങ്കിൽ നൈസ് ആയി ഒഴിവാക്കുന്നതാണ് ബുദ്ധി എന്നു മനസിലാക്കി എനർജി സേവ് ചെയ്യാനും തുടങ്ങി...

12. എന്റെ ദൈവമേ, എനിക്ക് വയ്യായെ, കുഴിയിൽ കൊണ്ട് വെയ്ക്കുന്നത് വരെ ഇതൊക്കെ അനുഭവിക്കാൻ ആണല്ലോ വിധി, എല്ലാത്തിനും എന്റെ ഈ കൈതന്നെ വേണം തുടങ്ങിയ ഡയലോഗ് കൾ പുട്ടിനു പീര പോലെ ഉപയോഗിക്കാൻ തുടങ്ങി....

13. സോഷ്യൽ മീഡിയയിൽ കാണുന്നതെല്ലാം പൊന്നല്ല... എന്ന തിരിച്ചറിവ് വന്നതിനാൽ... കൂട്ടുകാരികൾ/കാരന്മാർ പോസ്റ്റ്‌ ചെയ്യുന്നതിലെ സത്യാവസ്ഥ... അവർ അവരുടെ സന്തോഷത്തിനു വേണ്ടി ചെയ്യുന്നതാണ് എന്ന്‌ മനസിലാക്കി... വിഷമിക്കാതെ.... ബിഹൈന്റ് ദി സീൻസ് ആലോചിച്ചു സമാധാനിക്കാൻ തുടങ്ങി....

14. ഒപ്പം ഉള്ള പ്രായം ആയവരെ ആന്റി എന്ന്‌ വിളിക്കണോ ചേച്ചി എന്ന്‌ വിളിക്കണോ എന്ന കൺഫ്യൂഷൻ വരാൻ തുടങ്ങി.... പണ്ട് ടീനേജിൽ ആയിരുന്നപ്പോഴത്തെ പ്രശനം പോലെ ... ഏതു ക്ലബ്ബിൽ കേറും...??

15. എനിക്ക് നേരെ വരുന്ന ആന്റി എന്ന വിളികൾ ഇഷ്ടമില്ലാതിരുന്നിട്ടു കൂടി... കാലചക്രം കറങ്ങുമ്പോൾ സംഭവിക്കെണ്ടുന്നതിന്റെ അനിവാര്യത അക്‌സെപ്റ് ചെയ്യാൻ മനസ്സ് പാകപെടുത്തി...

16. ആരോഗ്യത്തിന്റെ പ്രാധാന്യം മനസിലാക്കാൻ അത്യാവശ്യം സാഹചര്യങ്ങൾ ഉണ്ടായി... അറിയാത്ത പിള്ള ചൊറിയുമ്പോൾ അറിയും എന്നാണല്ലോ..

17. ഇനി യുള്ളത് കിടന്നുപോകാതിരിക്കാനും, സ്വന്തമായി വടികുത്തി പിടിച്ചു നടക്കാനുമുള്ള ആരോഗ്യത്തിനായി നടപടികൾ തുടങ്ങി....

18. കൂട്ടുകാരികൾക്കും / ക്കാരന്മാർക്കും ഹാർട്ട്‌, പ്രഷർ, ഷുഗർ, കിഡ്നി തുടങ്ങിയ സംഭവങ്ങൾ ഉണ്ടെന്നറിഞ്ഞപ്പോൾ... എനിക്കും ഇതൊക്കെ ഉണ്ടാകുമോ എന്ന പേടിയായി.....

19. ടു വീലറിൽ പോകുമ്പോൾ സ്പീഡ് കുറച്ചുതുടങ്ങി.... പുറകെ വരുന്ന വണ്ടിക്കാരുടെ തെറിവിളികൾ കേട്ടു തുടങ്ങി.....

20. വിശ്വാസ വും സയൻസ് ഉം നിലവിലെ രാഷ്രീയവും തമ്മിൽ കുറച്ചു അടിപിടികൾ ഉണ്ടാവുകയും  തദ്വാര, എനിക്ക് നേരെ വന്ന ചൂഷണങ്ങൾക്ക് എതിരെ ശബ്ദം ഉയർത്താനും... അതുവഴി - പ്രശ്നക്കാരി, അഹങ്കാരി, അലമ്പത്തി, ദൈവദോഷം പറയുന്നവൾ, അവൾക്കു ഭയങ്കര നാക്കാണ് എന്നീ പട്ടങ്ങൾ ചാർത്തി കിട്ടി...

21. ഇത്രേം നാളുകൾ കൊണ്ട് ഞാനും ബിജുവും പിടിച്ച മുയലുകൾക്ക് മൂന്ന് കൊമ്പ് തന്നെ ഉണ്ട് എന്ന ഒരു  മ്യൂച്വൽ അണ്ടർസ്റ്റാൻഡിങ്ങിൽ എത്തിയതിനാൽ ... ലെവൽ ക്രോസ്സ് ചെയ്യാതെ..... പോകുന്നതാണ് രണ്ടുപേരുടെയും ആരോഗ്യത്തിന് നല്ലതെന്നു തിരിച്ചറിവ് ഉണ്ടായി ...

22. സ്വസ്ഥത എന്നു പറഞ്ഞാൽ - സ്വന്തം വീട്, സ്വന്തം വീട്ടിലെ വെള്ളത്തിൽ ഒരു കുളി,  ഇച്ചിരി കഞ്ഞിയും പയറും എന്നതായി...

കാര്യങ്ങൾ ഇനിയും ഒത്തിരി ഉണ്ട്... അങ്ങോട്ട്‌ ഓർമ കിട്ടുന്നില്ല... കർത്താവെ അൽഷിമെർഷ്യസ് വല്ലതും ആണോ...??

അന്നാ ഞാൻ അങ്ങോട്ട്‌ ഫോർറ്റീസ് ക്ലബ്ബിലേക്ക് കേറട്ടെ???

കാണാം,

ദീപ ജോൺ

22-0ct-2022